पुणे आणि पुणेकर मार्गदर्शक

यात पुण्यातल्या काही प्रसिद्ध जागांच्या नावांचे काही मजेदार अर्थ दिले आहेत. त्या जागा तशा निघाल्या नाहीत तर उगाच आश्चर्य वाटून घेऊ नये. त्यानंतर पुण्यामधील आणखी काही जागांची खास पुणेरी स्टाइलने पोस्टर्समधून ओळख करून दिली आहे तसेच खास पुणेरी विनोद (पुणेरी तडका) ही दिले आहेत 

याशिवाय पुणेरी शिष्टाचार, पुणेरी चौकसपणा याही जगावेगळ्या गोष्टी आहेत. आणि हो,  पुण्याला मोठा इतिहास आहे. आता इथे आलाच आहात, तर हे सगळेही खाली दिलेल्या दुव्यांवर वाचालच.
पुण्याचा इतिहास

असे घडत गेले ऐतिहासिक पुणे

पुणेरी आचारसंहिता http://anandghan.blogspot.com/2009/01/blog-post_08.html

‘शनिवारवाडा, पर्वती  अप्पा बळवंत चौक आणि स्वारगेट वगैरे’ https://anandghare.wordpress.com/2019/02/21/%E0%A4%85%E0%A4%AA%E0%A5%8D%E0%A4%AA%E0%A4%BE-%E0%A4%AC%E0%A4%B3%E0%A4%B5%E0%A4%82%E0%A4%A4-%E0%A4%9A%E0%A5%8C%E0%A4%95

पुणे, आयपीएल आणि पुणेरी पाट्या (सन २०१०मध्ये पुणे संघाला आयपीएलवर प्रवेश दिला होता त्या काळातल्या)
https://anandghare.wordpress.com/2010/03/28/%E0%A4%86%E0%A4%AF%E0%A4%AA%E0%A5%80%E0%A4%8F%E0%A4%B2%E0%A4%B8%E0%A4%BE%E0%A4%A0%E0%A5%80-%E0%A4%AA%E0%A5%81%E0%A4%A3%E0%A5%87%E0%A4%B0%E0%A5%80-%E0%A4%AA%E0%A4%BE%E0%A4%9F%E0%A5%8D%E0%A4%AF%E0%A4%BE/

पुणे का आवडते?

https://anandghare.wordpress.com/2020/04/07/%e0%a4%aa%e0%a5%81%e0%a4%a3%e0%a5%87-%e0%a4%95%e0%a4%be-%e0%a4%86%e0%a4%b5%e0%a4%a1%e0%a4%a4%e0%a5%87/

आठवणीतले (चित्रमय) पुणे

आठवणीतले (चित्रमय) पुणे


या पानावर वाचा ………..
पुण्यातल्या काही प्रसिद्ध जागा
पुणेरी सभागृहातील आचारसंहिता
पुण्यासंबंधीचे चुटकुले
पुणे आणि स्कार्फ
पुणेरी झटका…
पाणी वाचविण्याचे काही पुणेरी उपाय

पुणेरी शिष्टाचार
पुणेरी तिरकसपणा
अमुचे पुणे
अस्सल पुणेकर

पुण्याची कहाणी
पुणेरी ससा ?
नव्या पुणेरी पाट्यांचे प्रदर्शन
सुवासिक पुणे
माजोरी पुणे
हिंजवडीची चीड ?
खास पुणेरी शब्दकोष
पुण्याची वाडा संस्कृति
पुण्यवान!

————————————————

पुण्यातल्या काही प्रसिद्ध जागा

आडवी तिडवी वाट — वाकडेवाडी

धनवान रस्ता — लक्ष्मी रस्ता

आजोबांची पेठ — नाना पेठ

थंड हवेचे ठिकाण — सिमला ऑफीस

आदर्श वसाहत — मॉडेल कॉलनी

एकमेकांना मदत करणारा गाव — सहकार नगर

उग्र देवतेचा कट्टा — शनिपार

देवांचे पाघरुण — पासोड्या विठोबा

एक फळ देणारा दरवाजा — पेरुगेट

बेवडा ब्रीज — दारुवाला पूल

दगडाचा देव — पाषाण

अरण्यात रहाणाऱ्या देवाचे नाव — अरणेश्वर

थकल्या भागल्यांची वाडी — विश्रांतवाडी

पाव दरवाजा — क्वार्टर गेट

सुखी लोकांचे गाव — सुखसागरनगर

Pune guide 1

Pune guide 2

WhatsApp Image 2018-11-22 at 08.18.43

पुणेरी सभागृहातील आचारसंहिता

पुणेरी आचारसंहिता

पुण्यासंबंधीचे चुटकुले

मुंबईकर- तुमच्याकडे वडापावमध्ये तिखट चटणी का नसते?

पुणेकर- आमच्या जिभेला जन्मजात लावलेली असते..

😜😝😂

मुंबईकर : आम्ही दार्जीलिंगचा चहा वापरतो

पुणेकर : वा तरीच छान थंड होता

किमान शब्दात कमाल अपमान

😁😜

पुणेरी झणझणित खमंग फोडणी (PUNERI. TADKA)
😄😄😄😄😄

पुणेरी गिऱ्हाईक : मारुती चे Spare Parts आहेत काय?

पुणेरी दुकानदार : डोळे फुटले आहेत की वाचता येत नाही? बाहेर इतका मोठा बोर्ड टांगलाय आम्ही फक्त मारुतीचेच Spare Parts विकतो.

पुणेरी गिऱ्हाईक : ठीक आहे, एक गदा द्या

🤣🤣🤣😃😃😃😃🤣🤣

लेटेस्ट पुणेरी किस्सा

जोशी : मी इथले टॉयलेट वापरू का?

नेने : हो, पण पैसे पडतील

जोशी : नाही पडणार, बसताना काळजी घेईन मी

🤣🤣🤣😃😃😃😃🤣🤣

पुण्याच्या टिळक रस्त्यावरून, बाईक वरून जात होतो. एक स्त्री पुढे स्कूटरवर होती. अचानक ती उजवीकडे जाणाऱ्या रस्त्याला वळली (अर्थात इंडिकेटर किंवा हात न दाखवता).
मी तिला धडकलो. तिला म्हणालो, “अहो कमीतकमी हात तरी दाखवा वळताना”
तर ती म्हणाली, “त्यात काय हात दाखवायचा?, मी रोजच इकडे वळते”

🤣🤣🤣😃😃😃😃🤣🤣

पुणेकर : आहो, अजून बिस्किटे घ्या ना

पाहुणा : नको हो, आधीच मी ५ खाल्ली आहेत

पुणेकर : तशी तुम्ही ६ खाल्ली आहेत, पण आजून खा की, ईथे कोण मोजत बसलंय??

🤣🤣🤣😃😃😃😃🤣🤣

मुलगा : चाहूंगा मॆ तुझे सांज सवरे

मुलगी : आणि दुपारचे काय?

मुलगा : १ ते ४ विश्रांती. मी पुण्याचा आहे
🤣🤣🤣😃😃😃😃🤣🤣

पुण्यातल्या एका फ्री वायफाय नेटवर्कचा पासवर्ड, “घे भिकारड्या”
🤣🤣🤣😃😃😃😃🤣🤣

भिकारी : साहेब खूप भूक लागली आहे. ५ रुपये द्या ना

पुणेकर : १०० रुपयाची नोट आहे ९५ रुपये सुट्टे आहेत का?

भिकारी : हा आहे साहेब

पुणेकर : आधी ते खर्च कर
🤣🤣🤣😃😃😃😃🤣🤣

पुण्यातील एक खवचट म्हातारा एकदा दातांच्या डॉक्टरांकडे गेला. त्या खुर्चीत बसल्यावर डॉक्टरांनी त्यांना मोठा आ आ आ करायला सांगितले. कितीही मोठा केला तरी ते आजून मोठा करायला सांगायचे.

म्हातारा म्हणाला, “तोंडात बसून काढणार असाल तर ती पायातली चप्पल आधी काढा”

🤣🤣🤣😃😃😃😃🤣🤣

जोशी काकू : बघा, मंडईतून भाजी आणण्यापासून ओलिंपिक मेडल पर्यन्त सगळं बायकांनाच आणावं लागतंय

जोशी काका : आम्ही पुरुष मेडल बीड्ल्सच्या भानगडीत पडत नाहीत कारण कोणतंही मेडल आणले तरी बायको नाक मुरडणारच आणि ते बदलून आणायला पाठवणार…. अगदी गोल्ड मेडल जरी आणले तरी बायकोला डिझाईन पसंत पडेलच याची काय गॅरंटी?

🤣🤣🤣😃😃😃😃🤣🤣

आमच्या पुण्यातल्या लोकांना सगळं कसं जवळ हवं असतं
पश्चिमेकडे प्रति शिर्डी तयार करून ठेवलीय आणि
दक्षिणेकडे प्रति बालाजी
आता फक्त खडकवासल्यात प्रति अरबी समुद्र तयार करायचा बाकी आहे
मग सगळं कसं जवळ जवळ

🤣🤣🤣😃😃😃😃🤣🤣

स्वारगेट वर मुंबईची मुलगी आपल्या कॉलेज स्टाईल मध्ये तुच्छतेने कंन्डक्टरला विचारते : हे डबडं केव्हा हलणार इथून?

कंन्डक्टर (अदबीने, सस्मित) : कचरा भरल्यानंतर लगेचच !

तात्पर्य : महामंडळाच्या कंन्डक्टरचा नाद करू नये
🤣🤣🤣😃😃😃😃🤣🤣

पुणेकर : काका पावशेर रताळे द्या

दुकानदार : पिशवीत देऊ?

पुणेकर : नाही नाही… पेन ड्राईव्ह आणलाय. त्यात “रताळे” नावाचा फोल्डर बनवा आणि टाका त्यात
🤣🤣🤣😃😃😃😃🤣🤣

पुण्यात एकदा एका कॅन्टीन मध्ये दोन मुली स्कार्फ बांधून गप्पा मारत होत्या.
जवळजवळ अर्धा तास गप्पा मारत होत्या.

काही वेळाने दोघींनी स्कार्फ काढला आणि अचानक ओरडल्या, “अय्या तू कोण???”
🤣🤣🤣😃😃😃😃🤣🤣

पुण्यातील एक नामवंत डॉक्टर : तुमच्या आजाराचं नेमकं कारण माझ्या लक्षात येत नाहीये. कदाचित दारू प्यायल्यामुळे हे होत असावं…

पुणेरी पेशंट : हरकत नाही… तुमची उतरल्यानंतर येतो मी परत
🤣🤣🤣😃

धन्य ते पुणेकर!!!
एक पुणेकराने बंगल्याबाहेर एक पाटी लावली.
“वस्त्रपात्रप्रक्षालिका पाहिजे”
जो तो ती पाटी वाचून विचारात पडायला लागला. की बुवा याचा नेमका अर्थ काय? आता विचारायचे तरी कुणाला?

दुसर्‍याच दिवशी एका ‘जाणकार’ चाणाक्ष पुणेकराने त्या बंगल्याबाहेर शेजारीच एक टेबल मांडले, आणि त्यावर एक पाटी लटकाविली,

“शेजारी लिहिलेल्या पाटीवरील मजकूराचा अर्थ पाहिजे असल्यास खालील क्रमांकावर १० रुपयांचे डिजीटल पेमेंट करावे, मेसेज द्वारे उत्तर मिळेल.”

ज्यांनी ज्यांनी पेमेंट केले, त्यांना त्यांना मेसेज मिळत राहिला, “भांडी धुणे करायला बाई पाहिजे”

28-08-2019

😃😃😃🤣🤣

जपान मधे एक म्हण आहे,
If one can do,
You must do,
If no one can do,
You should do.
पुण्यात हीच म्हण होते
If one can do,
Let him do,
If no one can do,
मी कशाला धडपडू.

😃😃😃🤣🤣

तो दिसायला एकदम साधारण होता. ती पण जरा सावळीच होती. तरी सर्व मोहल्यातील लोक त्यांना

लक्ष्मी-नारायणाचा जोडा म्हणायचे;

कारण …..

.

.

तो लक्ष्मी रोडला राहायचा आणि ती नारायण पेठेत राहायची… !!!

. . . . . . . . . . . . . . . . . .. . . . . .. . . . . . . . .. .. .  . .15/09/2019
😂🤣😂🤣😂🤣

एक पालेभाजीपूर्ण वाक्य (अर्थात पुण्यातीलच)

तू “माठ”आहेस, सारख्या “चुका” करतोस, उद्या “पालका” सोबत ये! 😡
यावर विद्यार्थी म्हणाला…

“पडवळ” मॅडम… मला “गवार” समजू नका… माझ्या डोक्यात “बटाटे” भरलेत का?
दिसायला “लिंबू” टिंबू असलो तरी “कोथिंबीरे” आडनाव आहे माझं…
आणि कोणीही “आलं” गेलेलं मला ‘”भुईमुगाच्या” टरफला सारखं फेकू शकत नाय..

ना “कांदा” ना “लसून”….
आमच्या नादाला लागाल तर डायरेक्ट ससुन…

. . . . . . . . . . . . . . नवी भर दि. १०-१०-२०२०
😄😄😄 😁😁😁😁😁

🤣🤣🤣😃😃😃😃🤣🤣

पुणे आणि स्कार्फ

ही लंडनमध्ये 2015 मध्ये घडलेली सत्य घटना आहे.. ………. (असं म्हंटलं की लोकांना ते खरं वाटतं असं आमच्या पुण्याच्या लोकांना वाटतं)
लंडनमध्ये एका उच्चभ्रू , श्रीमंत gorge कुटुंबीय सहलीला गेलेले असताना त्यांच्या घरात जबरी चोरी होते..CCTV च्या फुटेजचा आधार आणि कुटुंबाशी संबंधित इतर सर्वांची माहिती घेऊन पोलिस काही संशयित तरुणांना पकडून आणतात.. परंतु CCTV फुटेज मध्ये चोरांनी चेहरा घट्ट झाकला असल्याने पोलिसांना त्यांना ओळखणे अवघड जात होते..त्याच वेळी त्यांना एक खबर मिळते कि लंडनमध्ये एक भारतीय युवक आहे तो या कामी तुम्हाला मदत करु शकेल.. हे संमजताच पोलिस त्या युवकाला पाचारण करतात आणि cctv फुटेज पाहून संशियत ओळखायला त्याची मदत मागतात..तो तरूण आपल्या लौकिकास जागतो, आणि काही वेळातच ते फुटेज पाहून त्या संशियातमधील नक्की चोर कोण आहे हे ओळखतो..पुढे अर्थात पोलिस त्या चोराची ट्रायल घेऊन , त्याच्या घराची तलाशी घेऊन मुद्देमाला सकट हि केस solve करतात.

पुढे यथावकाश त्या चोराला शिक्षा होते..आणि आपल्या घरातला मुद्देमाल परत मिळाला म्हणुन Gorge कुटुंबियांतर्फे एक पार्टी आयोजित केली जाते..त्यामध्ये चोर ओळखणाऱ्या त्या तरुणालासुद्धा आंमत्रित केले जाते आणि त्याला सर्व जण विचारतात कि , तुझे आम्ही अत्यंत आभारी आहोत, तुझ्यामुळेच आमची चोरी पकडली गेली..पण हे एक प्रश्न आहे कि त्या चोरानी इतके घट्ट तोंडाला बांधले होते..अक्षरशः पोलिस सुद्धा cctv फुटेज पाहुन ओळखु शकले नाही. पण तू हे कस काय ओळखु शकलास ?

यावर अत्यंत विनम्रपणे तो मुलगा उत्तर देतो, actually माझ नाव विनय आहे….माझा जन्म पुण्यातला,
* तिथे आम्ही लहांनपणापासून मुलींना स्कार्फमध्येच पाहतो. हळू हळू वाढत्या वयाबरोबर हे स्कार्फ प्रकरण मनात इतके घट्ट रुजत जाते कि आम्ही कोणी कितीही घट्ट स्कार्फ बांधला असला तरीही त्याला आम्ही सहज ओळखु शकतो इतका आमचा खोल अभ्यास होतो…………
* कारण जगाच्या पाठीवर आमचे पुणे हे एकमात्र शहर असे आहे कि जिथे ऋतु कोणताही असला तरीही “स्कार्फ” बाँधणे हे सक्तीचे असते..!

🤣😂🤣😂🤣

पुणेरी झटका..😄

सिनेमाच्या इंटर्व्हल नंतर अंधारात आपल्या सीटवर परत जात असलेल्या जोशीकाकूंनी सुरुवातीच्या सीटवर बसलेल्याला आस्थेने विचारले, “का हो..! मी बाहेर जाताना माझा पाय कोणाच्या तरी पायावर पडल्याने ते कळवळले..!😳 ते तुम्हीच का?

रागाने लालबुंद झालेला तो, “हो.. मग काय…. अत्ता सॉरी म्हणणार आहात का?”😛

जोशीकाकू :- सॉरी..? नाही हो..

(मागे वळून पाहत) या. बरोबर आहे. हीच लाईन ..!

😜😂😜 😜 😜 😜 😜
वॉट्सॅपवरून साभार.

—————————

नवी भर दि. १८-०४-२०१९ :

उन्हाळयानिमित्त पाणी वाचविण्याचे काही पुणेरी उपाय ..

१) पाणी दुसऱ्याला ‘धुण्यासाठी’ वापरू नका.😃😃

२) कोणालाही ‘पाण्यात पाहू’ नका.😃😃

३) ‘लिव्ह-इन’ सोडून ‘पाणिग्रहण’ करा😃😃.

४) हजामत करायची असल्यास ‘बिनपाण्याने’ करा !😃😃

५) पाहुणे आल्यास ‘आमटीत पाणी न वाढवता’ मसाला वाढवा.😃😃

६) पाणचट ‘विनोद’ करू नका.😃😃

७) कोणाच्याही माहेरच्या/सासरच्या माणसांचा ‘पाणउतारा’ करू नका.😃😃

८) मित्रांबरोबर बसलात तर, ‘पाणी कमी’ टाका.🍹🍹😃😃😃😃😃😃😃

😄😜😝😂😂🤑😛😉😉😜😝😀😀😄😜😝😂😂🤑😛😉😉😜😝😀😀
हिंदी शेजारीण (मराठी बाईला) : “दोपहर को क्या करती हो..???”🤔🤔🤔

पुणेरी (मराठी) बाई : “थोडा गिरती हूँ…!!”

शेजारीण : “क्या???”🤔🤔

मराठी बाई : “हाँ, हमारे पुणे में सब लोग दोपहरको 1 से 4 थोडा थोडा गिरते हैं..!!”

शेजारीण : “गिरनेसे आप लोगों को लगता नहीं…??”🤔🤔

मराठी बाई : “लगता है ना,

गिरने के बाद ताबड़तोब डोळा👁 लगता है….!!”
😄😜😝😂😂🤑😛😉😉😜😝😀😀
मुंबईकर :- ” काय करता आपण ?”

पुणेकर :– ” मोठा बिझनेस आहे माझा ! ”

मुंबैकर:–” कसला बिझनेस आहे आपला ?”

पुणेकर :–” सेलिंग ऑफ सॉफेस्टिकेटेड मॅन्यूअल गारमेंट होल्डिंग डिव्हाइसेस !!! ”

मुंबैकर :– ” वा वा ! म्हणजे नक्की काय ? ”

पुणेकर :– “पायजमा , परकर यांचे नाडे विकतो मी !!!”
😎😜😆🤪😄😜😝😂😂🤑😛😉😉😜😝😀😀


श्री.समीर जाधव यांच्या #आम्ही_ते_वेडे_ज्यांना_आस_इतिहासाची  या ब्लॉगवर पुण्यासंबंधी एक खास लेख आहे आणि त्यासोबत पुण्याची ऐतिहासिक छायाचित्रे दिली आहेत. ती या स्थळावर पहा : https://www.facebook.com/hashtag/%E0%A4%86%E0%A4%AE%E0%A5%8D%E0%A4%B9%E0%A5%80_%E0%A4%A4%E0%A5%87_%E0%A4%B5%E0%A5%87%E0%A4%A1%E0%A5%87_%E0%A4%9C%E0%A5%8D%E0%A4%AF%E0%A4%BE%E0%A4%82%E0%A4%A8%E0%A4%BE_%E0%A4%86%E0%A4%B8_%E0%A4%87%E0%A4%A4%E0%A4%BF%E0%A4%B9%E0%A4%BE%E0%A4%B8%E0%A4%BE%E0%A4%9A%E0%A5%80?source=feed_text&epa=HASHTAG


पुणेरी शिष्टाचार

पुणेरी माणसाला पुणेरी मराठीच समजते. म्हणून मानवीय स्रोत विभागाने (Human Resources Department) सर्व सूचना पुणेरी मराठीतून द्याव्यात अशी आमची विनंती आहे. काही उदाहरणे देत आहोत ..

पुणेकराकडून पुणेकरांसाठी

Please do not use reception areas and lobbies for reading newspapers, chit-chatting or for having snacks
………….. रिसेप्शन हे सार्वजनिक वाचनालय नाही. कामाखेरीज तेथे बसू नये .

Avoid occupying meeting rooms and lobbies for personal telephone calls
………. ह्या खोल्यांवर पैसा कामासाठी खर्च केला आहे.. तुमच्या गप्पांसाठी नाही

Restrain yourself from barging into the elevators without allowing those inside to step out first
…………….. ही लिफ़्ट आहे. लोकल ट्रेन नाही. सुटली तरी चालेल ..

Please don’t use the same elevator in case the same is being used by an associate along with client
…………… ग्राहक देवो भव. तुमचा पगार ह्यांच्याकडून येतो. कंपनी खिशातून काही देत नाही.

Avoid speaking in regional languages within the office premises
………….. गावच्या गप्पा घरी !

Please do not leave behind used tea cups or glasses in break out areas. Please deposit the same in appropriate areas. If you smoke, please ensure to extinguish cigarettes and throw the matches or cigarette buds only into ash pans provided for
…………… ही जागा तुमधे तीर्थरूप येऊन साफ़ करत नाहीत. जर तुम्ही चैतन्य काडी चावापर करत असाल तर तिचे बूड विझवायल विसरू नका. ते कोपऱ्यातले पॅन्स शोभेचे नाहीत. गुमान बूड त्याच्यातच विझवा. ऑफ़िसचा मालक तुमचा बाप नाही ..

When in office keep the ring tone of the cell phone low or silent. Please avoid having fancy ring tones when in the office
…………. शांतता राखा. हे ऑफ़िस आहे. तमाशाचा फ़ड नाही.

Please keep a check on the noise levels in the pantries
………… संयमाने आणि हळू बोला. आपले पूर्वज माकड असले तरी आपण आता माणसंआहोत.

. . . . . . . . . . . संपादन (नवी भर) दि.२५-०६-२०१९


पुणेरी तिरकस चौकसपणा

पुणेरी चौकसपणा

. . . . . . . . . . . संपादन (नवी भर) दि.२५-०६-२०१९

—————————————-

अमुचे पुणे

पुणे राकट    पुणे चिकट   पुणे हेकट
असेना का?

पुणे भाग्यवंत    पुणे धनवंत    पुणे ज्ञानवंतही
आहे ना?

पुणे गर्विष्ठ    पुणे महाशिष्ट     पुणे पोथीनिष्ठ
असेना का?

पुणे इतिहास    पुणे भविष्य     पुणे वर्तमानही
आहे ना?

पुणे वादांचे    पुणे वेदांचे     पुणे वेडाचेही
आहे ना?

पुणे शिवबाचे      पुणे रावबाचे    पुणे पुण्याईचे
आहे ना?

पुणे घाटी   पुणे मऱ्हाटी  पुणे भटी
असेना का?

चिकित्सकांचे    विक्रमवीरांचे    टिळक-आगरकरांचेही
आहे ना?

वाहनांच्या बेशिस्तीचा     पुंडांच्या मदमस्तीचा     सत्तेवरच्या हस्तींचा
आखाडा हा असेना का?

महाराष्ट्राच्या धरतीचे    मुळामुठेच्या भरतीचे      मुंबईकरांच्या विश्रांतीचे
आद्य ठिकाण आहे ना?

जगात प्रसिध्द    स्वयंसिध्द     लक्ष्मीलुब्ध
आहे ना?

विनोदाचे लक्ष्य    टिंगलीला भक्ष्य    सर्वांसमक्ष
असेना का?

सुंदरीलाच मिळतात    शालजोड्या शेलक्या    पुनवडी सुंदर
आहे ना?
_______

पुणे पुणे नी निव्वळ पुणे        गल्लोगल्ली बापट काणे
संगे वसती चव्हाण राणे        जगण्यापुरते नसते खाणे
जोतो अपुल्या चवीने हाणे      जिवंत येथे अस्सल गाणे
हरेक घरटी अस्सल नाणे      मिळती कोठे इतके शाणे
हरेक जपतो अपुले बाणे      अभिमानाचे सोळा आणे
सौजन्याच्या चवल्या उणे      तरीही विनंती परमेश्वरा
सत्वर व्हावे   अमुचे पुणे

खास पुणेकर आणि पुणेकरांसाठी ही स्पेशल कविता

कशी वाटली ते नक्की सांगा 🙏🏻

वॉसॅपवरून साभार दि.२९-०५-२०१९

**************************

३४६ पुणेरी चांभार

वॉसॅपवरून साभार दि.०६-०६-२०१९


खरा पुणेकर

मुळात पुण्यात जन्म घ्यायलाच पुण्य लागतं… पहिल्या उष्टावणात पु ना गाडगीळां कडून घेतलेली अंगठी चितळ्यांच्या श्रीखंडात बुडवून बाळाला चाटवली की त्या बाळाच्या पुणेकर होण्यास सुरुवात होते… कोवळे नाजूक दात आले की काका हलवाया कडची आंबा बर्फी किंवा काजू कतली खाल्ली की मग हा पुणेकर कोणाचेही दात घशात घालू शकतो… शालेय जीवनात कयानीचा केक खाल्ला नाही तर पुणे महानगर पालिका पालकांना दंड करते म्हणे… वैशाली, रुपाली, वाडेश्वर मध्ये एकदा तरी खाल्लं नसेल असा माणूस यौवनाची पायरी घसरून एकदम म्हातारा झाला असंच समजावं… उगा कोल्हापुरातील २-३ आणि नाशकातील २-३ मिसळींचं कौतुक ऐकवणाऱ्याला प्रत्येक चौकात नव्या चवीची मिसळ खिलवणारा खरा पुणेकर … आमची गणेशोत्सवाची लांबणारी मिरवणूक दिसते पण मानाच्या पहिल्या पाच गणपतींच्या विसर्जन मिरवणुकीच्या वेळी खरं कळतं ते पुणे, पुणेरी आणि पुणेरीपण अख्खी पुण्यनगरी दृष्ट लागेल अशी सजलेली असते… मराठी संस्कृती आणि नाविन्याची कास धरायची वृत्ती जपली असेल तर ती फक्त आणि फक्त पुण्यानेच… बाकी पुणेकरांपेक्षा १ ते ४ बंदचा त्रास पुणेतरांनाच जास्त होतो तो त्या वेळेमुळे नाही तर आपलं शहर पुण्यासारखं नाही यामुळेच

बहुत काय लिहिणे ?

ता. क.
जन्म नुसता पुण्यात असून चालत नाही तर तो कसबा , शनिवार, रविवार, सोमवार, बुधवार, गुरुवार, शुक्रवार, रास्ता पेठ नाना, गणेश, नारायण ,सदाशिव ह्या पेठांमधील असला तर सोन्याहून पिवळं .

😊😊

                    .. . . . . . . वॉटसॅपवरून साभार दि.१६-०६-२०१९

अस्सल पुणेकर

घाई आणी गर्दीत दगडूशेठ किंवा तळ्यातल्या गणपतीकडे बघुन जो जागेवरूनच मनोभावे नमस्कार करतो तो पुणेकर !
बाकरवडी आणी श्रीखंड चितळेंचच आणणारा आणि खाणारा तो पुणेकर !
एके ठिकाणी मिसळ चापतांना , दुसरी कडची मिसळ कशी भारी ह्याची चर्चा करणारा पुणेकर !
कॅम्प आणि एफ सी रोडवर ‘हिरवळ’ पहायला जातो तो पुणेकर !
पुणे मुंबई प्रवास डेक्कन क्वीन ने करून ऑम्लेट खाणारा तो पुणेकर !
पुण्यातील अठरा पेठांची नावे घडा घडा सांगतो तो पुणेकर !
पेशव्यांबद्दल आदर आणि पेशवाई चा थाटाबद्दलं अभिमान बाळगतो , तो पुणेकर!
कोणत्याही उपनगरात रहात असतांना , मुळ शहरात आल्यावर ‘ गावांत आलो ‘ असे म्हणतो , तो पुणेकर !
पुण्याला ‘ पुना’ म्हणणा-यांचा तिरस्कार करतो तो पुणेकर!
एम एच १२ सोडुन इतर नंबरच्या गाड्यांना गनिम समजतो तो पुणेकर !
हेल्मेट वापरण्याबद्दल जो न्यूनगंड बाळगतो तो पुणेकर !
इंच इंच भुमी लढवणार्या सैनिका प्रमाणे ट्रॅफीक मधे इंच इंच अंतर गाडी पुढे सरकवतो तो पुणेकर !
पुण्यात बाहेरून रहायला येउन स्वतःला उगाच पुणेकर म्हणवणार-याकडे दयाबूद्धीने बघून मनातल्या मनात हसतो तो पुणेकर !
वयाच्या साठीत आपल्या शाळा कॉलेजचा अभिमान बाळगतो तो पुणेकर !
मानाचे पाच गणपती चटकन सांगतो तो पुणेकर आणी विसर्जनाची मिरवणूक किती तास चालली ह्याची अभिमानाने चर्चा करतो तो पुणेकर !
आपल्या व्यवहारी स्वभावाला कंजूस आणी सडेतोड बोलण्याला कुजकट म्हणणा-यांकडे भुतदयेने बघुन दुर्लक्ष करणारा पुणेकर !
प्रत्येक गोष्टीत पुर्वी सारखी मजा राहिली नाही म्हणून हळहळणारा पुणेकर !
खरी गुणवत्ता ओळखून मनापासुन दाद देऊन , कौतूक करून , डोक्यावर बसवतो , तो पुणेकर !
सवाई गंधर्व महोत्सवापासुन जुन्या गाणांच्या कार्यक्रमांचा रसिकपणे आस्वाद घेतो तो पुणेकर !
जिलब्या गणपती, पत्र्या मारूती , पासोड्या विठोबा , खुन्या मुरलीधर , उंटाडे मारूती , दत्ताचे देऊळ, माती गणपती ही देवस्थाने ओळखतो तो पुणेकर!
खरेदीसाठी मॉल पेक्षा तुळशीबाग , लक्ष्मी रोड , फॅशन स्ट्रीट ज्याला जवळची तो पुणेकर !
श्री ,बेडेकर ,रामनाथ , अप्पा , खिका ह्या शब्दांची उकल ज्याला जमली तो पुणेकर !
भाऊ महाराजाचा बोळ , पंतसचिवाची पिछाडी, तपकीर गल्ली , तांबे बोळ, घसेटी पुल , खजिना विहीर, साततोटी ही ठीकाणे ज्याला कळाली तो पुणेकर !
वैशाली ,रुपाली , वाडेश्वर ह्या खांद्यसंस्थांनांना वारंवार अनुभवण्याचा वारसा जो पुढच्या पिढीपर्यंत पोहचवतो तो पुणेकर !
आपल्या बोलण्यात अरेच्चा , आयला , च्यायला , बोंबला पासून अस्खलित , अद्ययावत , यच्चयावत ह्या सारख्या शब्दांचा वापर सहज करतो तो पुणेकर !
सर्वांनी कर जोडावेत असा जो असतो तो पुणेकर !!!
सर्व अस्सल पुणेकरांना समर्पित !!🌹😊

🙏💐🙏 .. . . . . . . वॉटसॅपवरून साभार दि.२९-०१-२०२१

पुण्याची कहाणी

आटपाट नगर होतं ​
विद्येचं माहेरघर होतं ​​​​
​​​​
सह्याद्रीच्या कुशीत होतं​​​​
टेकड्यांच्या मुशीत होतं ​​​​
​​
मुळा-मुठा निर्मळ होती ​​​​​
गोड पाण्याची चंगळ होती ​​
​​
​काळ्या मातीत कस होता​​​​​​
वरण भात बस्स होता​​​​​​

निसर्गाचं देणं होतं ​​​​
पाताळेश्वरी लेणं होतं ​​​​
​​​​
नाव त्याच पुणं होतं ​​​​
खरंच काही उणं नव्हतं ​​​​
​​​​​
शिवबाचं बालपण होतं​​​
जिजामातेचं धोरण होतं​​​
​​
मोगलाई कारण होतं​​​
पुण्याचं ज्वलन होतं​​​
​​​
​छत्रपतींचं स्वराज्य होतं​​​​
पेशव्यांचं अटकेपार राज्य होतं​​​​
​​​​
निधड्या छातीचे मावळे होते​​​​
पराक्रमाने न्हायले होते​​​​

पर-स्त्री मातेसमान होती​​​​
कोल्ही-कुत्री गुमान होती​​​​
​​
नवसाला पावणारे गणपती होते​​​​
तालमीसाठी मारुती होते​​​​
​​
चिरेबंदी वाडे होते​​​​
आयुर्वेदाचे काढे होते​​​​

अंगणात रांगोळी होती​​​​​​
घराची दारं उघडी होती​​​​​
​​​​​​
संध्याकाळी दिवेलागणी होती​​​​
घरोघरी शुभंकरोती होती​​​​

गृहिणी अन्नपूर्णा होत्या​​​​
तडफदार स्वयंसिद्धधा होत्या
​​​​
जेवायला साधी पत्रावळ होती ​​
चौरस आहाराने परिपूर्ण होती​​​

वेदांचा अंगिकार होता​​​​​​​
विद्वान लोकांचा संचार होता​​​​​​

टिळकांची सिंहगर्जना होती​​​​
आगरकरांची सुधारणा होती​​​​
​​​​
फडके चाफेकरांचं बंड होतं
सावरकरांचं अग्निकुंड होतं
​​​
रानडे, फुले, कर्वे झटले होते​​​
बायकांचे जगणे फुलले होते​​​
​​
विद्वत्तेची पगडी होती​​​​
सन्मानाची भिकबाळी होती​​​​

घरंदाज पैठणी होती
शालिन नथणी होती

काटकसरीचा वारा होता
उधळपट्टीला थारा नव्हता

सायकलींचे शहर होतं
निवृत्त लोकांचे घर होतं

एका दमात पर्वती चढणं होतं
दुपारी उसाचा रस पिणं होतं

पुण्याची मराठी प्रमाण होती​​​​
शुद्धतेची कमाल होती​​​​

कलाकारांची कर्मभूमी होती​​​
पुणेकरांची दाद जरूरी होती​​​

सवाई गंधर्व, वसंत उत्सव होते
पुणेकरांना अभिमानास्पद होते
​​​​
सार्वजनिक मंडळे विधायक होती​​​​
समाज-स्वास्थाला तारक होती​​​​
​​​​
पण परंतु किन्तु….​​​​​
​​​​​
औद्योगिक क्रांती झाली​​​​
पुण्यामध्ये पिंपरी आली​​​​
​​
चारी दिशांनी कामगार आले​​​​​​
स्थानिक मात्र बेरोजगार झाले​​​​​​
​​
​​​कारखाने धूर ओकू लागले ​​
पुणेकर सारखे खोकू लागले ​​

संगणकाची नांदी झाली ​​
हिंजवडीची चांदी झाली ​​
​​
पुण्याची आय-टी पंढरी झाली​​
तज्ञांची मांदियाळी आली​​

तांत्रिक भाषा ओठावर रूजली​​​​​
मराठी मात्र मनातच थिजली​​​​​

उंच इमारतींचे पीक आले​​
शेती करणे अहित झाले

टेकड्यांवर हातोडा पडला
सह्याद्रीच तेवढा कळवळला

मुळा-मुठा सुकून गेली
सांडपाण्याने बहरुन आली
​​​​​
रस्ता गाड्यांमध्ये हरवत गेला​​​​​​
चालताना श्वास कोंडत गेला

पिझा बर्गर ‘जेवण’ झाले
सार्‍यांनाच आजारपण आले

डॉक्टरांनी आपली दुकाने थाटली
बँकांनी आरोग्यासाठी कर्जे दिली
​​​​​
‘युज अँड थ्रो’ प्रतिष्ठेचे झाले​​​​​​
जागोजागी ढीग कचऱ्याचे आले​​​​​​
​​​​
तरुणाई रेव पार्टीत रंगली​​​​
चारित्र्याची कल्पना मोडीत निघाली​​​​
​​
मारामारी, खून, बलात्कार झाले​​
निर्ढावलेल्या मनांचे साक्षात्कार झाले ​​
​​​​
​एकेकाळची पुण्य नगरी​​​​
होतेय आता पाप नगरी​​​​
भिन्न प्रांतीयांची भाऊगर्दी
कुठे हरवला अस्सल पुणेरी?​​​​​

. . . .    .. . . . . . . वॉटसॅपवरून साभार दि.१६-०६-२०१९
​​​​​

—————

पुणेरी ससा ???

पुणेरी ससा

.. . . . . . . वॉटसॅपवरून साभार दि.३०-०६-२०१९


नव्या पुणेरी पाट्यांचे प्रदर्शन

पुणेरी पाट्या १

पुणेरी पाट्या २

पुणेरी पाट्या ३

पुणेरी पाट्या ४

.. . . . . . . वॉटसॅपवरून साभार दि.११-०९-२०१९
————–

सुवासिक पुणे

त्या जागांच्या गंधकोशी, सांग पुणेकरा तू आहेस का?

काही गोष्टींचा वास हा सुवास, सुगंध त्या त्या ठिकाणच्या म्हणून ओळखला जातो, पुण्यात अशा काही जागा आहेत त्या तिथल्या गंधामुळे…
वैशालीच्या गल्लीत सांबारचा
रुपालीच्या कॉफीचा
सुप्रीम च्या पावभाजीचा
संतोष बेकरीच्या पॅटिस चा
भिडे पुलाशी नदीचा
राजमाचिकरांच्या गिरणीचा
अप्पा बळवंत चौकात नवीन पुस्तकांचा
लक्ष्मी रोड ला कोऱ्या साड्यांचा
सोन्या मारुती चौकात अत्तराचा
लकडे सुगंधीशी उदबत्तीचा
सुजाताच्या मस्तानीचा
भडबुंज्याशी फुटाणे भाजल्याचा
कल्पनाच्या भेळेचा
बादशाहिच्या पीठल्याचा
भारत दुग्धालयाशी दुधाचा
मंडई मधल्या कांद्याचा
गोल मंडई च्या कोथिंबिरीच्या
कुलकर्णी पंपावर पेट्रोल चा
न म शा च्या गल्लीत बुचाच्या फुलांचा
जबरेश्वरच्या चहाचा
शीतळा देवीशी डोसा, उत्तप्याचा
कयानीच्या श्रुजबेरीचा
मारझोरिंन पाशी सँडविच चा
चतुरशृंगी रोड च्या तंदुरी चा
दगडूशेठ पाशी निशिगंधाचा
दत्ताच्या देवळाशी खव्याचा
मृत्यूंजयेश्वराशी मोगऱ्याचा
जोगेश्वरीशी खारे दाण्याच्या वर ठेवलेल्या निखऱ्यांचा
अप्पाच्या बुर्जीचा
बेडेकरच्या मिसळ चा
बालगंधर्व मधल्या गजरा आणि सेंट चा
प्रभाच्या इथल्या बटाटे वड्याचा
आवारेच्या चिकन रस्स्सचा
स प च्या खो खो ग्राऊंडला पाणी मारल्या नंतरचा
डेक्कन च्या सिग्नल ला थांबल्यावर जुई च्या गजऱ्याचा

अशी अनेक ठिकाणं त्यांच्या सुवासामुळे ओळखली जातात,
त्या गोष्टी न खाता, न पीता, न विकत घेता त्यांचा अनुभव मिळतो, आणि घर करून राहतो मनात…….

. . . . . . . . वॉट्सॅपवरून साभार.       दि. २८-०५-२०२०

 

माजोरी पुणे (?)

पुणे –
हा जगाच्या पाठीवरचा एक अद् भूत त्रिकोणी भूप्रदेश आहे. मुठा नदी, टिळक रस्ता आणि बाजीराव रस्ता या त्याच्या तीन सीमा आहेत.
(बर्म्यूडा ट्रँगलने उगाच माज करू नये, त्या पापत्रिकोणात सर्व हरवते आणि या पूण्यत्रिकोणात हवे ते सापडते. )
शनिवार, सदाशिव आणि नारायण असे तीन स्वर्ग येथे नांदतात

दुपारी १ ते ४ या वेळात दुकानेच काय, वैकुंठ स्मशानभूमीही बंद असल्यास आम्हाला नवल वाटत नाही. कारण इथले ‘यम’नियमही स्वतंत्र आहेत.
वैशालीची इडली, गुड्लकचा बनमस्का नुकतीच अस्तंगत झालेली अप्पाची खिचडी, बेडेकरांची, रामनाथची अथवा श्रीकृष्णची मिसळ यापेक्षा जगात काही खाण्यालायक चवी असू शकतात यावर पुणेकरांचा विश्वास नाही. आम्ही चहाच्या दुकानालाही टपरी असे न संबोधता ‘अमृततूल्य’ म्हणतो

पुणे-मुंबई रस्त्याला मुंबई-पुणे रस्ता असे म्हणत नाहीत. कारण मानाच्या शहराचे नाव आधी घेण्याची पद्धत आहे.

येथे कोणाच्याही चुका काढून मिळतात ( विनामूल्य नव्हे तर चुका करणाऱ्याचा अपमान करून ) उदा. – गुगलवर मराठी टाईप करताना अद् भूत हा शब्द अद् आणि भूतच्यामध्ये स्पेस न टाकता लिहिता येत नाही. (जिज्ञासूंनी खात्री करून पहावी) त्यामूळे गुगल हे पुण्यात क्षूद्र मानले जाते.   ….. हे खरे नाही
गुगलपेक्षाही अधिक ज्ञानवंत माणसे पुण्यात गल्लोगल्ली सापडतात.
पुण्याच्या त्रिसीमा ओलांडून आत येताना त्यांच्याकडून अपमान सहन करण्याची तयारी ठेवली काय आणि नाही ठेवली काय, फरक पडत नाही कारण अपमान तुम्हाला विचारून होतच नाही. आपला अपमान झाला यातच धन्यता मानून आपल्या गावी परत जावे.
तरीही आजकाल, ‘गणपती बघायला आले आणि इथेच राहिले’ या तत्त्वावर घुसलेली आणि मूळ पुण्यवासियांच्या उपकारांवर जगणारी माणसे स्वतःला पुणेकर म्हणवतात. परंतू त्यांच्यात आणि अस्सल पुणेकरांत चितळ्यांची बाकरवडी आणि काका हलवाईची बाकरवडी एवढा फरक असतो.
असे तोतया पुणेकर ओळखण्यासाठी त्यांना खालील प्रश्नपत्रिका सोडवायला द्यावी –

एका वाक्यात उत्तरे द्या
१. मानाच्या ५ गणपतींची नावे आणि क्रम काय ?
२. अप्पा बळवंतांचे आडनाव काय ?
३. श आणि ष असलेले प्रत्येकी किमान ५ शब्द सांगा

खालील विषयांवर निबंध लिहा –
१. पूण्यनगरीचा सरकता प्रेमबिंदू सारसबाग ते Z ब्रीज
२. जागतिक रंगभूमीचा आधार – अर्थात, पुरुषोत्तम करंडक.

सविस्तर उत्तरे द्या –
१. सवाई गंधर्वात तिकीट न काढता कसे घुसावे ? (२ युक्त्या सांगा)
२. मस्तानी आणि मिल्कशेक विथ आईस्क्रीम यातील नेमका फरक सांगा
३. पत्र्या, जिलब्या, भांग्या, डुल्या, सोन्या, खुन्या ही देवांची नावे कशी निर्माण झाली ?

हिंमत असल्यास पुढील मुद्दे खोडून दाखवा. –
१. पर्वती ही जगातील सर्वात उंच टेकडी आहे
२. तुळशीबागेमध्ये अॅमेझॉनपेक्षा जास्त विक्री होते
३. पुण्यात गाडी चालवता येणं हे सूपर नॅचरल स्कील असून ते जन्मतःच यावं लागतं. RTO ही अंधश्रध्दा आहे
४. टिळक टँकची खोली अरबी समुद्रापेक्षा जास्त आहे.

योग्य पर्याय निवडून गाळलेल्या जागा भरा – (अर्थात सर्व पर्याय बरोबरच आहेत) –
१. पुणेकर ….. असतात
(चोखंदळ / रसिक / ज्ञानी / विचारवंत)
२. कोणत्याही विषयावर चर्चा हे इथले …… आहे
(व्यवच्छेदक लक्षण / आद्यकर्तव्य / मूख्य काम / वेळ घालवायचे साधन )
३. फर्ग्यूसन रस्त्यावर ….. आढळते
(ज्ञान / सौंदर्य / चव / सर्व काही)
४. एस् पी कॉलेज चा फूल फॉर्म ….. असा आहे.
(सूंदर पोरींचे / सपक पोरांचे / सनातन प्रकृतीचे / सर परशुराम)

अर्थात ही केवळ लिटमस टेस्ट आहे. पुण्यात शिरण्याची पळवाट नाही. पुणेकर म्हणवणे ह यूएस् चा व्हिजा मिळवण्याएवढे सोपे नाही हे लक्षात ठेवावे.
यातील एकाही प्रश्नाचे उत्तर चुकले आणि १०० पेक्षा कमी गुण मिळाले तर तो गृहस्थ अपमानित होण्याच्याही लायकीचा नाही असे समजावे आणि भूतदया दाखवून त्याला वेशीबाहेर सोडून द्यावे…
लेखक माहीत नाही. 💐

. . . . . . . . वॉट्सॅपवरून साभार.    दि. ०६-०६-२०२०

*****

हिंजवडीला जाणारी लोकं चिडलेली का असतात?

सदैव “वाकड” यात शिरतात. उलट बोलल्याशिवाय त्यांना “रावेत” नाही. लोका सांगे ब्रह्मज्ञान, स्वतः मात्र “पाषाण”. तडफदार आणि “बाणेर”. अहंकाराने “औंध” झाले आहेत सगळे. त्यांच्या भल्याचे “सांगवी” तर ऐकत नाहीत. सतत असलेल्या ट्रॅफिकशी काहीतरी “निगडी”त आहे. त्यामुळे त्यांना सारखा “देहू” दंड भोगावा लागतो. खूप कष्ट “सूस” वे लागतात. IT मध्ये खूप “बावधन” आहे पण ट्रॅफिक मूळे डोक्याचा “भुगाव” होतो. खूप वेळ ट्रॅफिक हलले नाही की एकमेकांचा हॉर्न वाजवून “भोसरी” च्या म्हणत उद्धार करतात. ट्रॅफिक बघून त्यांना “खडकी”च भरते. पहाटे “गहूनजे’ निघतात ते सूर्य “म्हाळुंगे” ला तरी घरी येत नाहीत. “बालेवाडी”त घातलेल्या पोरांना ,आईबाप एकदम मॅट्रिक पास झाले की च भेटतात.
अवघड आहे एकंदर.. वा रे पुणेरी

🧐🙄😃😆😝🤣😜😉        नवी भर दि. ०६-११-२०२०

🧐🙄😃😆😝🤣😜😉 🧐🙄😃😆😝🤣😜

हा शब्दकोश किती खरा आहे की खोटा आहे हे मला माहीत नाही. यातले काही अर्थ आवडले नाहीत तर सोडून द्यावेत.      . . . .  नवी भर दि. ११-०१-२०२१

पुणेरी शब्दकोष

केशव – साधा सरळ माणुस, नाका समोर बघून चालणारा.
सामान – त्याची प्रेयसी.
काटा काकु – चांगली दिसणारी पण वयाने ज्यास्त.
खडकी – एकदम टुकार.
झक्कास – एकदम चांगले.
काशी होणे – गोची होणे.
लई वेळा – नक्की, खात्रीने.
चल हवा येवू दे – निघून जा.
मस्त रे कांबळे – छान, शाब्बास.
पडीक – बेकार.
मंदार – मंद बुध्दीचा.
चालू – शहाणा.
पोपट होणे – फजिती होणे.
दत्तू – एखाद्याचा हुज~या.
बॅटरी – चश्मेवाला / चश्मेवाली.
पुडी – माणिकचंद व दुसरा गुटखा.
राष्ट्रगीत वाजणे – संपणे / बंद पडणे.
पुडी सोडणे – थाप मारणे.
खंबा – दारुची / बीयरची बाटली.
पावट्या – एकदम मुर्ख.
खडकी दापोडी – हलक्या प्रतीचे.
टिणपाट – काहीच कामाचा नसलेला.
पेताड / बेवडा – खुप दारु पिणारा.
डोलकर – दारु पिवून झिंगणारा.
सावरकर – दारु पिवून झिंगणा-याला सावरणारा.
वकार युनूस – दारु पिवून ओकारी करणारा.
सोपान – गांवढंळ माणुस.
श्यामची आई – 18+ सिनेमा.
सांडणे – पडणे.
जिवात जिव येणे – गरोदर रहाणे.
पाट्या टाकणे – रोज तेच तेच काम करुन वेळ घालवणे.
भागवत – दुस-याच्या जिवावर जगणारा.
पत्ता कट होणे – शर्यतीतुन बाहेर होणे.
फणस लावणे – नाही त्या शंका काढणे.
फिरंगी – कोकाटे इंग्लीश फाडणारा.
पेटला – रागावला.
बसायचे का? – दारु प्यायची का?
चड्डी – एखाद्याच्या खुप जवळचा.
हुकलेला – वाया गेलेला.
डोळस – चष्मेवाला/ली.
यंत्रणा – जाड मुलगी.
दांडी यात्रा – ऑफीसला बुट्टी मारणे/खाडा.
चैतन्य कांडी – सिगारेट/बिडी.
चैतन्य चुर्ण – तंबाखु.
चेपणे – पोटभरुन खाणे.
कल्ला – मज्जा.
सदाशिव पेठी – कंजुष.
बुंगाट – अती वेगाने.
टांगा पल्टी – दारुच्या नशेत `आउट’ झालेला.
थुक्का लावणे – गंडवणे.
एल एल टी टी – तिरळा. लुकिंग लंडन टॉकिंग टोकियो.
घ्या श्रीफळ – जा आता घरी.
कर्नल थापा – थापाड्या.
सत्संग – ओली पार्टी

😝🤣😜😉 🧐🙄😃

नवी भर दि.२७-०२-२०२१ : पुण्याची वाडा संस्कृति

– पुण्याची वाडा संस्कृती !!
पेशवाईतील सरदार व प्रतिष्ठित मंडळींनी त्यावेळी नवीन वसलेल्या पेठांमध्ये आपल्या कुटुंब-कबिल्याच्या वस्तीसाठी प्रशस्त वाडे बांधले. या वाड्याचे प्रवेशद्वार म्हणजे मोठा – क्वचित प्रसंगी उघडला जाणारा भक्कम लाकडी दरवाजा, रोजची जा-ये करण्यासाठी ठेवलेला लहान दिंडी दरवाजा. आत शिरल्यावर लगेच ओसरी, मोठा चौक व त्यानंतर बंदिस्त अशा राहण्याच्या खोल्या. मागच्या बाजूला मोठे अंगण.. बाहेरचा दरवाजा एकदा बंद केला की वाड्याला पूर्ण संरक्षण मिळे.
पेशवाईचा अस्त व त्यानंतर होत गेलेले सामाजिक बदल यामुळे कुटुंबे छोटी झाली, त्यांना रहाण्यासाठी मोठ्या वाड्याची गरज संपली. अनेक मालकांनी हे जुने वाडे योग्य ती डागडुजी करून बाहेरच्या कुटुंबांना भाड्याने देणे चालू केले. पुढे जुने वाडे व चाळ यांचे दुवे म्हणता येतील असे – अनेक कुटुंबे भाड्याने राहू शकतील अशा वाडे-वजा इमारती पुण्यातील पेठामध्ये बांधण्यात आल्या. बहुतांशी, ब्राम्हण कुटुंबे येथे राहू लागली – त्यांनी पुण्याची संस्कृती जपली व वाढवली..
मुंबईतील चाळी व पुण्यातील वाडे यांच्यामधील फरक असण्याचे हे महत्त्वाचे कारण असावे.
सरकारी खात्यात कारकुनी करणारे वा निवृत्त लोक वाड्यात राहणे पसंत करीत. बहुतेक कुटुंबांकडे १०’ X १०’ च्या एक किंवा दोन खोल्याच असत. दोन खोल्या असणारे कुटुंब श्रीमंत समजले जाई. घरातील लहान मुले व वृद्ध वाड्याच्या व्हरांड्यात अगर अंगणातच कायम असत. जणू काही एकच कुटुंब असल्यासारखे राहणाऱ्या सर्व कुटुंबात एकोपा असे.. सुख – दुःखाच्या प्रसंगी हे आवर्जून लक्ष्यात येई. सगळे सण-वार, लग्न-मुंजी सारखे समारंभ यात सर्वांचा सहभाग असे.
मिळून मिसळून वागणे, नेतृत्व गुण, अनेक कलांचे शिक्षण, सामाजिक भान, धिटाई अशा अनेक गोष्टी मुले आपोआपच वाडा संस्कृतीत शिकत. त्यातून जगाच्या घकाधकीला सहज तोंड देऊ शकणारे सुजाण व सुशिक्षित नागरिक घडणे सोपे होई.
मोकळ्या वेळात मुले विटी-दांडू, लगोरी, हुतूतू, खोखो, रिंग टेनिस, क्रिकेट, हे वर्षभर चालणारे खेळ अंगणात खेळत. अनेकवेळा क्रिकेटची खरी बॅट, बॉल, स्टंप्स विकत घेण्याची ऐपत नसल्याने, लाकडी फळी ही बॅट, तुटलेल्या लाकडी पाटाचे स्टंप, तर सायकलची रबरी ट्यूब कापून त्याचे गोल गोल तुकडे कागदाच्या अगर चिंधीच्या बोळ्यावर बांधून केलेला बॉल करून क्रिकेट खेळत. चुकून कुणाला बॉल लागला अगर कुणाच्या घरात गेला व त्या लोकांनी तो परत दिला नाही तर वाड्याच्या सामायिक शिमग्याला सर्वजण त्या लोकांचा उद्धार करायचे .. अर्थात त्यातून कौटुंबिक संबंधात कोणतीच कटूता येत नसे.
काळाच्या ओघात ते आठवणीतील माझे सुंदर पुणे त्याचबरोबर ते वाडे व मुख्यतः वाडा संस्कृती कुठे व केव्हा वाहून गेले ते कळलेच नाही… बहुधा पानशेतच्या पुरामध्ये ते वाहून गेले असावे.
सुरेश नाईक

– – – – – – – – – –

पुणे आणि पुणेकर ह्यांना अनेक जण नावे ठेवताना आढळतात. ह्याचे कारणच मला अद्याप आढळले नाही..
पण तरी त्या नावे ठेवणार्यांना एक उत्तर द्यावे असे मात्र आज ठरवले आहे..
ही कविता समस्त पुणेकरांनी अगदी अभिमानाने पुढे पाठवावी अशी इच्छा आहे..!
😄

पुण्यवान!

पुण्यवान किती आम्ही खरोखर
नागरिक हो पुण्याचे
विद्येच्या माहेरी करितो
स्वागत साऱ्या साऱ्यांचे ||१||

शुद्ध भाषा आम्ही बोलतो
चोखंदळ हो भलतेच
इथून पावती घेऊन मिरवती
तरी पुणे ह्यांना सलतेच..||२||

जन्मापासून आम्हीच पेशवे
रुबाब का आम्ही करू नये ?
पाट्या वाचून हसणार्यांनी
पाऊलच पुण्यात ठेऊ नये ||३||

मिसळ पुणेरी, अन चितळ्यांची
करू नका कुणी बरोबरी
आमच्या इकडे अन्नपूर्णा हो
पाणी भरते घरोघरी.. ||४||

असे बिघडले , तसे बिघडले
कशास करता तक्रारी
जगभरातले लोक नांदती
ही पुण्यभूमीची जादूगरी ||५||

पुण्यवान हो आम्ही पुणेकर
गुण अजून मी काय गावे?
इथे जन्मण्यासाठी ऐका
शत जन्माचे पुण्य हवे ||६||

शेवटचे एकच सांगून ठेवते
ठेवलीत जर नावे पुण्याला
दुर्लक्ष करूनि हेच म्हणू आम्ही
द्राक्षे आंबट कोल्ह्याला!! ||७||

अश्विनी देशपांडे, २२/०९/२०२० (पुणेकर)

. . . . . . .  वॉट्सॅपवरून साभार  दि.१०-०६-२०२१

​​​​​

लेखक: anandghare

आंजर्जालविश्वात भटकत असतांना वेचलेले शंख, शिंपले आणि गारगोट्या या ठिकाणी गोळा करून ठेवणार आहे. त्यात एकादा मोती किंवा हिरकणी पण सापडेल कदाचित.

3 thoughts on “पुणे आणि पुणेकर मार्गदर्शक”

प्रतिक्रिया व्यक्त करा

Fill in your details below or click an icon to log in:

WordPress.com Logo

You are commenting using your WordPress.com account. Log Out /  बदला )

Google photo

You are commenting using your Google account. Log Out /  बदला )

Twitter picture

You are commenting using your Twitter account. Log Out /  बदला )

Facebook photo

You are commenting using your Facebook account. Log Out /  बदला )

Connecting to %s